പാലക്കാട്: നിയമസഭാ തിരഞ്ഞെടുപ്പിനോടനുബന്ധിച്ച് ജില്ലയിൽ പോളിംഗ് നടപടികൾ പൂർത്തിയാക്കിയ വോട്ടിംഗ് മെഷീനുകൾ സൂക്ഷിക്കുന്ന സ്ട്രോങ്ങ് റൂമുകൾക്ക് കനത്ത സുരക്ഷ . ഓരോ നിയമസഭാ മണ്ഡലങ്ങൾക്കുമായി ഒന്ന് വീതം ആകെ 12 സ്ട്രോങ്ങ് റൂമുകളാണ് സജ്ജീകരിച്ചിരിക്കുന്നത്. ഇവയുടെ സുരക്ഷയും സുരക്ഷിതത്വവും ഉറപ്പാക്കുന്നതിനായി എല്ലാ സ്ട്രോങ്ങ് റൂമുകൾക്കും മുന്നിലായി കേന്ദ്ര സേനയെ വിന്യസിച്ചിട്ടുണ്ട്. കേന്ദ്ര സേനയ്ക്ക് പുറമെ സംസ്ഥാന പൊലീസും അഗ്നി രക്ഷ സേനയും ഇവിടെ ഡ്യൂട്ടിയിലുണ്ട്.തിരഞ്ഞെടുപ്പ് കമ്മീഷന്റെ നിർദ്ദേശപ്രകാരം മൂന്ന് ലെയറുകളുള്ള (Three Cordon Security) സുരക്ഷാ സംവിധാനമാണ് നടപ്പിലാക്കിയിരിക്കുന്നത്. സ്ട്രോങ്ങ് റൂമുകൾ സിസിടിവി ക്യാമറകളും സജ്ജമാക്കിയിട്ടുണ്ട്. ഇതുവഴി 24 മണിക്കൂർ നിരീക്ഷണം ഉറപ്പാക്കുന്നു. കൂടാതെ, ഉദ്യോഗസ്ഥരുടെ പ്രവേശനം രേഖപ്പെടുത്തുന്നതിനായി ഓരോ നിയമസഭാ മണ്ഡലം അടിസ്ഥാനത്തിലും ലോഗ് ബുക്കുകൾ സൂക്ഷിച്ചിട്ടുണ്ട്.ജില്ലയില്‍ മൂന്ന് വോട്ടെണ്ണല്‍ കേന്ദ്രങ്ങളാണ് സജ്ജീകരിച്ചിട്ടുള്ളത്. പത്തിരിപ്പാല മൗണ്ട് സീന പബ്ലിക് സ്‌കൂള്‍, അകത്തേത്തറ എന്‍.എസ്.എസ് എഞ്ചിനീയറിങ് കോളേജ്, പാലക്കാട് വിക്ടോറിയ കോളേജ് എന്നിവിടങ്ങളിലാണ് വോട്ടെണ്ണല്‍ കേന്ദ്രങ്ങള്‍. തൃത്താല, പട്ടാമ്പി, ഷൊര്‍ണൂര്‍, ഒറ്റപ്പാലം മണ്ഡലങ്ങളിലെ വോട്ടെണ്ണല്‍ പത്തിരിപ്പാല മൗണ്ട് സീന പബ്ലിക് സ്‌കൂളിലും കോങ്ങാട്, മണ്ണാര്‍ക്കാട്, മലമ്പുഴ, പാലക്കാട് മണ്ഡലങ്ങളിലെ വോട്ടെണ്ണല്‍ അകത്തേത്തറ എന്‍.എസ്.എസ് എന്‍ജിനീയറിങ് കോളേജിലും തരൂര്‍, ചിറ്റൂര്‍, നെന്മാറ, ആലത്തൂര്‍ മണ്ഡലങ്ങളിലെ വോട്ടെണ്ണല്‍ പാലക്കാട് ഗവ. വിക്ടോറിയ കോളേജിലും നടക്കും. മെയ് നാലിനാണ് വോട്ടെണ്ണല്‍ നടക്കുക.