യുഡിഎഫ് സ്ഥാനാർത്ഥി രാഹുൽ മാങ്കൂട്ടത്തിൽ വൻഭൂരിപക്ഷത്തിൽ വിജയിക്കും. തെരഞ്ഞെടുപ്പ് കമ്മീഷന്റെ വെബ്സൈറ്റിലും മാധ്യമങ്ങൾ പുറത്തു വിട്ടതിലുമുള്ള പോളിംഗ് കണക്കുകളിൽ വ്യത്യാസങ്ങളുണ്ട്. വ്യത്യസ്തമായ കണക്കുകളാണ് പുറത്തുവന്നിരിക്കുന്നത്. 70.51 ആണ് പോളിംഗ് ശതമാനം. കഴിഞ്ഞ പാർലമെന്റ് തിരഞ്ഞെടുപ്പിനേക്കാൾ ഒരു ശതമാനം പോളിംഗ് മാത്രമാണ് കുറഞ്ഞിരിക്കുന്നത്. പാലക്കാട് നഗരസഭയിൽ 67% ആണ് പോളിംഗ്. കഴിഞ്ഞ ലോക്സഭാ തെരഞ്ഞെടുപ്പ് പോളിങ്ങിനെക്കാൾ 8% ആണ് കുറവ് വന്നിരിക്കുന്നത്. എന്നാൽ പിരായിരിയിൽ 71% പോളിംഗ് ഉണ്ട്. കഴിഞ്ഞ ലോക്സഭയെ വെച്ചുനോക്കുമ്പോൾ ഒരു ശതമാനത്തിന്റെ മാത്രം കുറവാണ് ഉള്ളത്. യുഡിഎഫിന്റെ ശക്തി കേന്ദ്രങ്ങളിൽ ഒട്ടും വോട്ട് കുറഞ്ഞിട്ടില്ല. ബിജെപിയുടേത് എന്ന് പറയപ്പെടുന്ന മേഖലകളിൽ 8% പോളിംഗ് ആണ് കുറവ് രേഖപ്പെടുത്തിയിരിക്കുന്നത്. മാത്തൂരും കണ്ണാടിയിലും വോട്ട് കൂടിയതിന് അനുസരിച്ചുള്ള പോളിംഗ് ശതമാനത്തിലെ വർദ്ധനവ് ഉണ്ടായിട്ടുണ്ട്. യുഡിഎഫിനെ സംബന്ധിച്ചിടത്തോളം തികഞ്ഞ ആത്മവിശ്വാസത്തിലാണ്. കഴിഞ്ഞ നിയമസഭാ ലോക്സഭ തെരഞ്ഞെടുപ്പുകളിൽ ലഭിച്ചതിനേക്കാൾ വലിയ ഭൂരിപക്ഷത്തിൽ യുഡിഎഫ് ജയിക്കും. ഇതുതന്നെയാണ് അവസാനഘട്ട കണക്കുകളിലും പ്രകടമാകുന്നത്. അവസാനഘട്ടത്തിൽ രാഷ്ട്രീയം കൃത്യമായി ചർച്ച ചെയ്യുവാൻ കഴിഞ്ഞത് യുഡിഎഫിന് നേട്ടമാണ്. ആദ്യഘട്ടങ്ങളിൽ പുകമറകൾ സൃഷ്ടിച്ച്, വിവാദങ്ങൾ ഉണ്ടാക്കി ജനങ്ങളുടെ ശ്രദ്ധ മാറ്റുവാൻ ശ്രമം ഉണ്ടായെങ്കിലും അതെല്ലാം വിഫലമായി. ആ ശ്രമങ്ങൾക്ക് നേതൃത്വം ഒരു മുന്നണി ആയിരുന്നില്ല. ബിജെപിയും സിപിഎമ്മും ഒരേപോലെ അത്തരം ശ്രമങ്ങൾക്ക് നേതൃത്വം നൽകി. ഓരോ വിവാദങ്ങളിലും ഒപ്പം നിന്ന് യുഡിഎഫിനെയും കോൺഗ്രസിനെയും ഇല്ലാതാക്കുവാനാണ് ശ്രമം നടത്തിയത്. അതിനു പിന്നിൽ ഉണ്ടായിരുന്ന അജണ്ട കേന്ദ്ര സംസ്ഥാന സർക്കാരുകളുടെ ജനദ്രോഹ നയങ്ങൾ മണ്ഡലത്തിൽ ചർച്ച ചെയ്യപ്പെടരുത് എന്നതായിരുന്നു. ജനങ്ങൾ നേരിടുന്ന ബുദ്ധിമുട്ടുകളും പ്രതിസന്ധികളും കൃത്യമായി ഉയർത്തിക്കാട്ടുവാൻ യുഡിഎഫിന് കഴിഞ്ഞു. ദേശീയ സംസ്ഥാന രാഷ്ട്രീയം ചർച്ചയ്ക്ക് വെക്കുവാൻ യുഡിഎഫിന് കഴിഞ്ഞു. പരിപൂർണ്ണമായും ജനങ്ങളെ വിശ്വാസത്തിലെടുത്ത് പ്രവർത്തിച്ചു. ഈ തവണ പാലക്കാട് മുനിസിപ്പാലിറ്റിയിൽ യുഡിഎഫിന് മേൽകൈ ഉണ്ടാവും. 12,000 നും 15,000 നും ഇടയിലുള്ള ഭൂരിപക്ഷത്തിൽ രാഹുൽ വിജയിക്കും. – വി കെ ശ്രീകണ്ഠൻ തെരഞ്ഞെടുപ്പ് കഴിഞ്ഞിട്ടും ജനങ്ങളെ ആശങ്കയിലാക്കുന്ന സമീപനം സിപിഎമ്മും ബിജെപിയും പിന്തുടരുകയാണ്. തെരഞ്ഞെടുപ്പ് കഴിഞ്ഞ ഉടൻതന്നെ കോൺഗ്രസിന്റെ ശക്തി കേന്ദ്രങ്ങളിൽ വോട്ട് കുറഞ്ഞുവെന്നും ബിജെപിയുടെ ശക്തി കേന്ദ്രങ്ങളിൽ വോട്ട് ഉയർന്നുവെന്നും വ്യാപക പ്രചരണം നടന്നു. കണക്കുകൾ പൂർണമായി ലഭിച്ചശേഷം പ്രതികരിക്കുവാൻ തീരുമാനിക്കുകയായിരുന്നു. പോളിംഗ് ശതമാനത്തിൽ കുറവ് വന്നു എന്നത് വസ്തുതയാണ്. എന്നാൽ അവർ പ്രചരിപ്പിക്കുന്നത് പോലെയല്ല. യുഡിഎഫ് കേന്ദ്രമെന്ന് പറയുന്ന പിരായിരിയിൽ ഏറ്റവും അധികം വോട്ടുകൾ പോൾ ചെയ്യപ്പെട്ടത് ഈ തെരഞ്ഞെടുപ്പിലാണ്. ബിജെപിക്ക് ആശ്വസിക്കുവാനുള്ള ഒരു കണക്കും ഈ തെരഞ്ഞെടുപ്പുമായി ബന്ധപ്പെട്ട് ഇല്ല. പല ബിജെപി പ്രവർത്തകരും ബൂത്തുകളിൽ വോട്ട് രേഖപ്പെടുത്തിയിട്ടില്ല. യുഡിഎഫിനെ സംബന്ധിച്ച് അങ്ങേയറ്റം ആത്മവിശ്വാസം ഉണ്ട്. ബിജെപിയുടെ ഇപ്പോഴത്തെ അവകാശവാദം പോലും കൂടുതൽ ഊർജ്ജമാണ് യുഡിഎഫിന് നൽകുന്നത്. ഓഫീസ് വരെ തുറന്ന് ഇരുന്ന അനുഭവം മുമ്പ് ഇവിടെയുണ്ട്. പാലക്കാട് നിന്ന് ഒരു എംഎൽഎ നിയമസഭയിലേക്ക് പോകുന്നുണ്ടെങ്കിൽ അത് രാഹുൽ മാങ്കൂട്ടത്തിൽ ആയിരിക്കും. തെരഞ്ഞെടുപ്പുമായി ബന്ധപ്പെട്ട പ്രചാരണവേളയിൽ ഇരുകൂട്ടരും നടത്തിയ എല്ലാ പ്രതികരണങ്ങളും പ്രവർത്തികളും യുഡിഎഫിന് അനുകൂലമാവുകയായിരുന്നു. ന്യൂനപക്ഷങ്ങളുടെ മതേതരബോധത്തെ വരെ വെല്ലുവിളിക്കുവാനും പരീക്ഷിക്കാനും വരെ ശ്രമം നടന്നു. പരസ്യ വിവാദത്തിൽ ഉൾപ്പെടെ ന്യൂനപക്ഷ ഭൂരിപക്ഷ വ്യത്യാസമില്ലാതെ ജനങ്ങളുടെ ശക്തമായ പ്രതിഷേധം ഉണ്ടാകും. സിപിഎം പ്രവർത്തകരിൽ പോലും അവമതിപ്പ് ഉണ്ടാവും. കോൺഗ്രസ് വനിതാ നേതാക്കൾ തങ്ങിയ ഹോട്ടലിൽ നടത്തിയ റെയ്ഡ് നാടകത്തിൽ പോലീസിൽ നിന്നും നടപടി ഉണ്ടായില്ലെങ്കിൽ നിയമനടപടികൾ കൂടുതൽ ശക്തമായി സ്വീകരിക്കും. ഒരാൾ ബിജെപി വിട്ടപ്പോൾ നൽകിയ പരസ്യത്തിൽ ബിജെപിക്ക് എതിരായോ ഇപ്പോഴുള്ള ബിജെപി നേതാക്കൾക്കെതിരായോ ഒരക്ഷരം പോലുമില്ല. വർഗീയ രാഷ്ട്രീയ ഉപേക്ഷിച്ച ഒരാൾക്കെതിരെ മാത്രം പരസ്യം കൊടുക്കുവാൻ കാട്ടിയ സിപിഎമ്മിന്റെ ഗതികേട് ആർക്കും മനസ്സിലാക്കാവുന്നതാണ്. – ഷാഫി പറമ്പിൽ എംപി